Ang pag-inom sang kape ang napamatud-an na sadto pa lang nga nagahatag sang madamo nga health benefits.
Apang nahibalo-an mo man bala nga apisar indi mo na pag-imnon ang imo kape, maka-angkon ka sa gihapon sang benepisyo sa ikaayong lawas?
Natukiban sa resulta sang pagtuon sang Journal of Environmental Psychology sa Estados Unidos nga ang mga tawo nga nakapanimaho kag nakasimhot sang baho sang kape apisar wala ini gin-inom ang naka-angkon mental boost kag nagsangkad ang ila productivity.
Sa isa ka eksperimento nga ginlunsyar sang amo nga pagtuon, gintunga ang 114 nga business students agud magkuha sang math exam sa duha ka hulot sa diin ang isa ang napun-an sang baho sang kape.
Sa ulihi, ang mga estudyante nga nagkuha sang exam sa hulot nga puno sang baho sang kape ang lunsay nakakuha sang mataas nga grado.
Napamatud-an sa amo nga pagtuon nga ang baho sang kape ang may yara sang ‘placebo effect’ nga nagahatag sang pagka-alerto, focus, kag nagapa-improve sang mental functioning sang tawo.
Nahibaluan nga nadiskubrehan man sang mga scientist sa isa ka eksperimento nga nadula ang fatigue kag stress sang mga ilaga nga kulang sa tulog matapos nakasimhot sang baho sang kape.
