ILOILO CITY -Igadangop sang Iloilo City Police Office (ICPO) sa Regional Anti-Cybercrime Unit ang ginakabig makaalarma nga pag-appear sang isa ka pornographic material sa Facebook wall sang pila ka mga police officials sang syudad.
Ang amo nga pornographic material ang may bastos nga caption kag nagapakita sang isa ka babaye nga nagahigda sa katre.
Lakip sa na-tag sa amo nga materyal amo sanday Police Captain Shella Mae Sangrines nga amo ang spokesperson sang ICPO kag nagaserbe man nga hepe sang Iloilo City Police Station 1 kag amo man ang hepe sang Arevalo Police Station nga si Police Captain Chen Tañagras.
Sa interview sang Bombo Radyo kay Sangrines, iya ginpahayag nga ‘tanan sila ang biktima’ sa amo nga porn material kag ini ang ginakabig nga technical sabotage ukon ‘pagpangsabotahe sa identity sang pulis’.
Ginapahayag nga ginkakas na ang amo nga materyal sa wall sang isa ka pulis apang liwat naman nga nagbalik.
Suno kay Sangrines, ang nag-tag nga Facebook account ang nakapangalan kay Rey Brinquez, isa man ka pulis nga assigned sa Negros Occidental.
Ginkontak ni Sangrines ang amo nga pulis kag gilayon man sini nga ginpanginwala ang pag-tag sang amo nga porn material nga nagdalahig indi lamang sa police officials kundi pati sa iban nga katapo sang media kag abogado.
