Magagmay ang mga sakayan nga ginagamit sang Philippine National Police (PNP) Maritime Group sa pagpatrolya sa West Philippine Sea gani limitado lang ang mahimo sini sa tunga sang kahangawa dala sang presensya sang mga Chinese vessels sa sulod sang exclusive economic zone (EEZ) sang Pilipinas.
Sang nagligad nga semana, ginkumpirma sang National Task Force for the West Philippine Sea (NTF-WPS) nga 240 ka barko sang China ang nakit-an nga yara pa nagatinir sa nanuhay-tuhay nga bahin sang West Philippine Sea.
Suno sa pinakaulihi nga statement sang amo nga task force, ginreport sang Western Command of the Armed Forces of the Philippines ang presensya sang Chinese maritime militia vessels sa territorial waters sang Kalayaan sa Palawan kag sa dagat nga sakop sang EEZ sang Pilipinas.
Kasunod sini, nag-file ang Department of Foreign Affairs (DFA) sang diplomatic protest bangud sang pagpamalibad sang China nga pahalinon ang ila mga sea vessels.
Suno kay PNP Maritime Group chief Brigadier General John Mitchell Jamili, tubtob lamang sa 24 nautical miles halin sa archipelagic baselines ang malab-utan sang ila pagpatrolya bangud indi man dalagku ang sea vessels nga ginagamit sang pungsod para sa sovereignity patrols.
“But the PNP Maritime Group is very willing to patrol up to the exclusive economic zone that is why we have these wish list to have bigger ships and also kung tutulong yung PNP Maritime Group kung kinakailangan, yes we are very willing to help in this endeavor,” pahayag sang natungdan.
May kaangtanan diri, ginpahayag ni PNP chief General Debold Sinas nga nagapakig-angot ang ahensya sa Armed Forces of the Philippines may kaangtanan sa pagproteher sa West Philippine Sea.
