CALINOG, ILOILO – Nagpositibo sa COVID-19 ang 16 ka mga pulis nga nagabantay sa Jalaur River Multi-Purpose Project Stage II (JRMP II) sa Barangay Agcalaga, Calinog, Iloilo.
Ang nasambit nga mga pulis ang assign sa Regional Mobile Force Battalion.
Sa interview sang Bombo Radyo kay Dr. Cesarey Mestidio, Municipal Health Officer sang Calinog, Iloilo, nag-umpisa ang paglaton sang virus matapos nagsulod ang isa ka pulis sa compound sang Daewoo Engineering and Construction Company agud magkuha sang tubig.
Matapos ang pila ka adlaw, nagbatyag sang sintomas sang COVID-19 ang nasambit nga pulis kag sang ginswab, nagpositibo ini sa virus.
Sang ginpaidalom ang mga kaupod sini nga pulis sa swab test, 15 sa ila ang nalatnan sang COVID-19.
Sa subong, naka-isolate na ang nasambit nga mga pulis sa ila Barracks malapit sa Daewoo Engineering and Construction Company.
Nagapadayon naman ang contact tracing sang mga naclose contact sang nasambit nga mga pulis.
