Nagsabat ang Iloilo Police Provincial Office (IPPO) kasunod sang nabaton nga report nga wala na gina-id-idan ang pag-check sang travel pass sa mga nagalabay sa quarantine control points sa probinsya sang Iloilo.
Requirement sa gihapon ang travel pass samtang napaidalom ang probinsya sa modified enhanced community quarantine ukon MECQ tubtob sa Hunyo 30.
Sa interview sang Bombo Radyo kay Pol. Col. Gilbert Gorero, director sang IPPO, iya ginpahayag nga may mga pribado nga salakyan nga saulo na mismo sang nagabantay sa control point gani nga wala na ginaparahan.
Isa pa ka paagi sang mga pulis amo ang pag-check samtang ara pa lang ang salakyan sa terminal kag gina-markahan na lang ang travel pass agud nga indi na kinahanglan nga isa-isahon kun mag-abot sa quarantine control point.
Sa sini nga paagi suno kay Gorero, indi na mag-delay ang salakyan sa tunga sang dalan kag malikawan ang reklamo sang mga tawo.
Madumduman nga Hunyo 4 nag-umpisa ang travel pass requirement sa Iloilo kadungan sang ginpatuman ang border restrictions.
