Sundon sang Philippine National Police (PNP) ang ‘chain of command’ kasunod sang hingyo sang isa ka International Criminal Court (ICC) prosecutor para sa judicial authorization agud makapadayon sa pag-imbestigar sa ginapahayag extrajudicial killings sa Pilipinas.
Una diri, nagpanindugan ang Malacañang nga indi magkooperar si Presidente Rodrigo Duterte sa ICC sa anuman nga imbestigasyon sa ginapahayag lapnagon nga patyanay sa away sang administrasyon kontra sa droga.
Sang ginpamangkot naman ang hanay sang pulis kun magakooperar ang PNP kun may yara na sang authorization ang ICC probe, ginpahayag ni PNP chief Guillermo Eleazar nga magatutok sila sa ila trabaho kag kun may yara gid man sang violation, may kaugalingon nga mekanismo ang PNP agud nga makapapanaug sang sanction.
Suno pa kay Eleazar, bangud isa ini ka international issue, ang Department of Foreign Affairs ang nakatutok diri.
Nagpanindugan si Eleazar nga wala ginatolerate sang pulis ang patyanay kun indi man ini base sa self-defense.
Sa record sang PNP, may yara sang7,000 nga napatay sa drug war apang kun ang human rights group ang pahambalon, naglapaw ini nga record sa 27,000.
