Nagpangabay si Pope Francis sa mga lider sang militar sa Myanmar nga pasugtan man nga makalab-ot ang ayuda sa mga ginagutom nga mga tawo nga naglihu-liho umpisa sang ginpatuman ang kudeta sa amo nga pungsod sang nagligad nga Pebrero 1.
Ini nga pangabay sang Santo Papa ang kaagay man sa nangin apelar sang mga Catholic Bishops sa Myanmar sang nagligad nga semana.
Liwat man nga ginbuksan sang Santo Papa ang diskusyon sa eksperyensya sang linibo ka mga tawo sa Myanmar kun sa diin may mga nagakapatay na sa gutom.
Magluwas diri, nag-apelar man si Pope Francis sa militar nga respetuhon ang mga religious sanctuaries kaangay sang simbahan, pagodas, monasteries, mosques, temples, schools kag hospitals nga amo ang neutral places nga ginapanaguan sang tawo.
Una na nga nabatian halin sa Santo Papa ang matunog nga hingyo sa militar nga buy-an na ang mga political prisoners sa Myanmar.
Matandaan nga ang United Nations General Assembly ang una man nga nagpanawagan sa militar nga respetuhon ang nangin resulta sang November election kag i-release na ang political detainees kaangay sang sibilyan nga lider nga si Aung San Suu Kyi.
