Gin-athag ni Presidente Rodrigo Duterte nga mandatory sa gihapon ang pagsuksok sang face shield — indoors man ukon outdoors — agud nga malikawan sang Pilipinas ang second wave sang COVID-19 ilabi na subong nga nadugangan ang kaso sang delta variant, ang coronavirus variant nga una nga natukiban sa India.
Suno kay Duterte, indi pinal ang iya una nga pahayag sang ginsiling niya nga sa ospital lang kinahanglanon ang face shield.
Agresibo suno kay Duterte ang Delta variant kag mahimo maglapta sa malip-ot lang nga tion.
Una diri, nagreport ang Department of Health nga may yara na subong sang 17 ka kaso sang delta variant sang COVID-19 sa Pilipinas.
Sa Talk to the Nation Cabinet briefing ni Presidente Duterte, may gin-imbitar nga mga infectious disease expert nga makapaathag dugang sang iban nga protocol nga kritikal nga ipatuman bilang panagang batok sa delta variant.
Suno kay Dr. Edsel Salvana sang Department of Health Technical Advisory group, kinahanglan ang istrikto nga border control agud malikawan ang community transmission sang sini nga variant.
Panugyan ni Salvana, ang mga manug-abot nga byahero ang kinahanglan magtinir sa quarantine facility sa sulod sang 10 ka adlaw.
Sa ikapito nga adlaw, dapat sila nga ipaidalom sa COVID-19 test.
Ang nabilin nga apat ka adlaw (agud makumpleto ang 14-day mandatory quarantine) ang pwede man nga padayunon sa sulod lang sang balay.
