Nalipay si Police Executive Master Sergeant Ceasar Pinuela, chief sang Community Relations sang Jaro Police Station, nga naabi-abi ni PNP Chief Police General Guillermo Eleazar ang iya maayo nga mga hinimuan bilang isa ka pulis.
Si Pinuela ang kilala na nga nagapatigayon sang Bible study sa mga detainees kag nagapanghatag man sang pagkaon kag face shields.
Makit-an man siya nga personal nga nagadonar sa mga community pantries kag nagapatigayon sang feeding program subong nga may pandemya.
Magluwas diri, si Pinuela ang nagaluto man sang pamahaw sa iya opisina sa Jaro Police Station kag ginakarga sa police car kag ihatag sa makit-an niya nga mga pigado.
Ini nga mga akto ang ginkilala sang PNP Chief kag ginhimo nga huwaran sa iban nga mga pulis.
Sa interview sang Bombo Radyo kay Pinuela, iya ginpahayag nga bugal gid para sa iya ang apresasyon ni Eleazar.
Panugyan naman ni Pinuela sa iban nga mga pulis, mag-focus gid sa trabaho, magpangamuyo, kag ipaiway na ang mga bisyo.
