ILOILO – Hugot ang pagbantay sang mga pulis sa banwa sang Banate, Iloilo agud malikawan ang pagtililipon kadungan sang ika-167 nga kapiyestahan sang banwa sa pagpasidungog sa patron nga si San Juan de Bautista.
Sa interview sang Bombo Radyo kay Pol. Lt. Randy Lambungan, hepe sang Banate Municipal Police Station, iya ginpahayag nga wala sang programa subong nga adlaw kag wala sang may makasulod nga pangayaw sa banwa.
Gina-monitor man sang mga pulis, barangay officials, kag barangay volunteers ang palibot ilabi na sa Barangay Poblacion agud nga wala sang social gathering subong nga napaidalom sa Modified Enhanced Community Quarantine (MECQ) ang probinsya.
Suno sa hepe, ginapahanugutan man ang selebrasyon apang para lang sa magpamilya nga nagapuyo sa sulod sang balay.
Wala man ginapahanugutan ang pag-inom inom sang makahulubog nga ilimnon bangud tubtob pa sa Hunyo 30 ang liquor ban.
SAN JUAN DE BAUTISTA SA ILOILO CITY
Sa syudad sang Iloilo, ginpahayag naman ni Iloilo City Police Office (ICPO) director Pol. Col. Uldarico Garbanzos nga may mga naka-deploy gid nga mga pulis agud magbantay sa mga distrito sa syudad.
Subong nga San Juan de Bautista, tubtob gab-i ang pagbantay sang mga pulis.
May mga nagapaligo man sa baybay kaina sang aga apang ginsunod gid ang mga protocol kag limitado lang sa magpamilya ang pagsinadya-sadya sang tingob.
