Nagpasalig si Presidential Spokesperson Atty. Harry Roque nga indi mawigit ang Iloilo City kag Iloilo Province pag-abot sa allocation sang COVID-19 vaccines halin sa national government.
Kadungan sang pagbisita ni Roque sa syudad kahapon nga adlaw kag pagdul-ong sang medical equipment kag COVID-19 vaccines, iya ginpahayag nga samtang yara pa siya sa serbisyo sa gobyerno, indi madehado ang syudad kag probinsya sang Iloilo sa anuman nga sahi sang ayuda halin sa gobyerno.
Sa interview sang Bombo Radyo kay Roque, iya ginpahayag nga anak man siya sang Iloilo kag palangga niya ang Iloilo kaangay sang pagpalangga niya sa iya nga iloy.
“Huwag po kayong mag-alala dahil ako po ay anak din ng Iloilo. Habang ako po ay nasa gobyerno, hinding-hindi po madedehado ang Iloilo City at ang Iloilo Province sa lahat ng ayuda na mabibigay po ng ating gobyerno.”
Dugang pa ni Roque: “I love Iloilo City the same way that I love my mother. I will make sure na hindi madedehado ang Iloilo City.”
Sabat ini sang presidential spokesperson kasunod sang kwestyon ni Mayor Jerry Treñas sa Iloilo Freedom Grandstand kahapon sang aga kun sa diin liwat nga nabukadan ang kakulangan sang national government sa bulig sa syudad sang Iloilo sa away batok sa COVID-19.
