Umpisahan na sang Iloilo City Government ang barangay-based COVID-19 vaccination sa Byernes, Hulyo 9, para sa mga Persons with Disabilities (PWDs) kag senior citizens.
Sa interview sang Bombo Radyo kay Iloilo City Mayor Jerry Treñas, iya ginpahayag nga unahon ang Barangay Calumpang sa distrito sang Molo.
Target nga matublukan sang Sinovac COVID-19 vaccines ang 300 ka mga tigulang kag PWDs.
Katuyuan man sini suno sa alkalde nga indi na mabudlayan ini nga mga sektor nga magpila sa designated vaccination centers sa syudad nga subong ginalakipan sang Iloilo Convention Center (ICON), Central Philippine University (CPU), Ateneo de Iloilo, University of San Agustin (USA), kag University of the Philippines -Visayas (UPV).
Ginahanda na subong suno sa alkalde ang manpower kag ang equipment para sa inoculation.
Si Calumpang Punong Barangay Roberto Niño ang magaserbe nga manager sa amo nga inoculation site.
Suno kay Treñas, bisan gamay lang anay nga populasyon nga mabakunahan apang importante nga mahibaluan kun ano pa ang kinahanglanon nga pauswagon.
Plano man nga isunod pa gid ang iban nga mga barangay sa syudad.
