ILOILO – Ginpasar na sa Sangguniang Panlalawigan ang ordinansa nga ginduso agud nga makatukod sang help desk sa mga barangay sa probinsya agud nga mas maproteheran ang tawhanon nga kinatamatarong sang mga pumuluyo.
Ini amo ang ‘An Ordinance To Protect and Promote Human Rights in the Province of Iloilo by Establishing Local Human Rights Action Centers at Every Level of Local Government in the Province of Iloilo and Providing Funds Thereof’ nga ginduso ni Third District Board Member Matt Palabrica.
Sa interview sang Bombo Radyo kay Palabrica, iya ginpahayag nga katuyuan sini nga may madangpan ang pumuluyo nga may problema sa human rights violations. P1 million ang budget kada tuig nga kuhaon sa General Fund sang Iloilo Provincial Government.
Ang Barangay Human Rights Action Center ang pamunuan ni Governor Arthur Defensor Jr sa provincial level, tagsa ka local chief executive sa municipal ukon city level, kag punong barangay sa mga barangay level.
