Gin-athag sang Iloilo Provincial Government nga naka-recover na tanan ang mga pasyente nga taga-probinsya sang Iloilo nga infected sang lain-lain nga variants sang COVID-19.
Una diri, ginkumpirma mismo ni Iloilo Provincial Administrator Atty. Suzette Mamon nga base sa report sang Department of Health (DOH), may 15 na ka Alpha variant sa probinsya, 14 ka Beta variant, kag 1 ka P.3 variant.
Sa interview sang Bombo Radyo kay Mamon, iya ginpahayag nga subject sa istrikto kag kumpleto nga monitoring ang mga pasyente.
Ginapatigayon man ang backtracing ukon pag-check sang travel history agud mahibaluan kun sa diin halin ang infection.
Apisar indi highly-contagious kag tuman ka transmissible kaangay sang Delta variant ukon variant nga una natukiban sa India, ginapatigayon man sa gihapon ang contact tracing kag pag-countercheck sang case profile sang mga infected nga pasyente.
‘Raw data’ pa lang suno kay Mamon ang ginauyatan sang Iloilo Provincial Health Office gani ginatugyan na sa DOH ang pag-anunsyo kun sa diin gid partikular nga mga banwa naghalin ini nga mga kaso.
