Na-eksperyensyahan mo man bala nga ma-akigan sang imo ginikanan bangud wala ikaw nagabulig sa mga ulubrahon sa sulod sang balay?
Nagasunod ka man bala sa sugo sang imo iloy kag amay, ukon ikaw bala nagapamurugso kag nagabato?
Sa Anhui province sa China, may isa ka 14 anyos nga anak nga nagpadulong sa police station kag ginpasakaan sang kaso nga ‘Illegal Child Labor’ ang iya nga amay’.
Ini matapos ginapahayag ginapwersa siya sang iya ginikanan nga manghugas sang pinggan, kag manglimpyo sang ila balay.
Suno sa amay, luyag niya nga manuto ang 14 anyos sa paghimo sang mga ulubrahon sa sulod sang balay bangud ang paghampang sa cellphone lamang ang gina-atendir sang iya anak.
Pahayag sang amay, bangud man sa pagka-adik sa cellphone, nagaka-kompromiso na ang pagtuon sang iya anak nga lalaki.
Apang lipod sa ihibalo sang amay, nagpadulong naman ang 14 anyos sa police station sa baylo nga tumanon ang mga ginapahimo sa iya nga ulubrahon sa sulod sang ila balay.
Naham-ot kag nakibot naman ang mga pulis sa diin gindul-ong nila anay pauli ang solterito kag gin-istorya ang amay sini.
