Indi patas para sa ordinaryo nga mga pumuluyo nga maggasto gid sang mahal kag magsuksok sang face shield sa ngalan sang pagtuman sa protocol KUN overpriced kag kwestyonable man gali ang pag-procure sini sang national government.
Ini ang sentimyento sang pila ka mga residente sang syudad sang Iloilo matapos nabatian ang kontrobersiya nga naglupok kaangot sa pagbakal sang gobyerno sang Personal Protective Equipment (PPE).
Sandig sa 2020 audit report sang Commission on Audit (COA) ang Procurement Service of the Department of Budget and Management (PS-DBM) DBM-PS ang nagbakal sang 113.905 million nga face masks balor P27.72 kada isa kag 1,317,711 nga face shields nga nagabalor P120 kada isa.
Magluwas diri, nadiskubrehan man sang state auditors nga sang katapusan sang 2020, may yara sang 484,000 ka face shields nga na-stock lang sa depots sang PS-DBM.
a interview sang Bombo Radyo kay Raulito Valle, isa ka manugtahi sang sapatos sa syudad, iya ginpahayag nga apisar nabudlayan man siya sa protocol, ginabatas niya ang pagbakal kag pagsuksok sang face shield.
Suno kay Valle, indi man siya luyag mamayad sang multa kun madakpan siya nga wala sang face shield. Kuntani suno sa iya, ginhatag na lang sa mga pumuluyo ang ginpangtago nga face shield.
“Sagabal ang face shield kun manahi ako. Te hambal nila para sa virus man ina kuno. Nagasunod na lang ako kay kun indi ka magsunod, mahal man ang multa. Pigado pa ako nga daan,” pahayag sang natungdan. “Ipanagtag man tani nila para mapuslan man sang mga tawo.” See Less
