ILOILO CITY – Nagdangat na sa 12 ang numero sang COVID-19 positive nga crew sang 2GO cargo vessel nga naka-angkorahe sa Iloilo Strait.
May 16 pa ka crew nga ginpaidalom sa swab test kahapon, Agusto 27, kag ginahulat pa ang resulta.
Sa interview sang Bombo Radyo kay Iloilo City COVID-19 team spokesperson Mr. Jeck Conlu, iya ginpahayag nga locked down sa gihapon ang amo nga cargo ship samtang wala pa nag-ayo ang infected nga mga indibidwal.
Yara man sa amo nga vessel ang ila naka-close contact nga mga crew apang nagatinir sa separado nga cabin.
Nahibaluan nga Iloilo-Davao-General Santos City ang ruta sang amo nga vessel apang nakahapit pa sa Bacolod City antes nagdiretso sa Iloilo City.
Nakabatyag na nga daan sang flu-like symptoms ang index case sang nagdungka sa syudad sang Iloilo gani nga wala na ginpapanaug ang mga crew halin sa adlaw sang ila nga pag-abot. #
