Mas nagatunog pa ang panawagan sang mga ospital agud nga maglab-ot sa igdulungog sang Philippine Health Insurance Corporation (PhilHealth) nga i-review sang maid-id kag isuspinde ang bag-o nga circular sa temporary suspension sa hospitals payment claims nga ginakabig under investigation.
Rason sang mga ospital, gindungan gid sang PhilHealth ang Temporary Suspension of Payment of Claims (TSPC) sa tion nga may COVID-19 pandemic kun san-o nga may yara pa sang mga balayran ang amo nga state-run insurer sa mga healthcare providers.
Ang Philippine Hospital Association ang nagsiling nga ang PhilHealth ang may balayran pa nga P13.6 billion sa mga ospital nga “denied claims”, P13 billion tubtub P16 billion nga in-process claims, kag P46 billion nga Return to Hospital (RTH).
Sa Iloilo City pa lang, masobra na sa isa ka bilyon ka pesos ang dapat bayaran sang PhilHealth sa mga ospital.
Depensa naman sang PhilHealth, ang ila bag-o nga circular ang gin-isyu lang para sa “proper fund management” kag agud makontrol ang nagakatabo nga “fraud”.
Sa sining wala pa nahitso nga problema sa tunga sang Philhealth kag sang mga ospital, sa diin malugar ang mga pumuluyo? Ano kadaku ang risgo sini para sa mga pumuluyo nga nagakinahanglan subong sang hospital care?
SA WESTERN VISAYAS
Sa interview sang Bombo Radyo kay Dr. Elmer Pedregosa, hospital administrator sang Iloilo Mission Hospital kag presidente sang Private Hospial Associations of the Philippines – Western Visayas Chapter, iya ginpahayag nga “wala nag-untat ang payment sang Philhealth” apang “delayed lang ang paghatag sa mga ospital” rason nga indi man mahatag sang maayo ang serbisyo sa mga tawo.
Sa tion sang COVID-19 pandemic nga pakadto-pakari ang mga tawo sa ospital, kinahanglan man suno kay Pedregosa nga dasigon ini kuntani agud nga indi man mapiang ang operasyon sang ospital.
“Ano ang matabo sa healthcare system kun amo sini ang sitwasyon subong: we are in the midst of the pandemic, there are so many things to do, damo ang na-admit sa ospital, kag tapos here we are doing as much as we can pero waiting for a big amount for Philhealth to pay,” pahayag ni Pedregosa.
Antes sini, may mga hospital groups na sa pungsod nga nagpamahog nga kakson na nila ang ila kaangtanan sa Philhealth. Buot silingon sini, ang PhilHealth members ang indi na maka-avail sang PhilHealth benefits kun magkadto sila sa member-hospitals. Buot silingon pa gid, kun may luyag i-avail nga serbisyo sa ospital, dapat nga may ‘cash on hand’ nga dala ang pumuluyo.
SA ALEGASYON SANG PHILHEALTH NGA MAY FRAUDULENT CLAIMS
Wala pa ang pandemya suno kay Pedregosa, may ginapatigayon na nga imbestigasyon ang Philhealth sa ila ginaalegar fraudulent claims sang mga ospital.
Apang ang indi mahangpan sang ospital: Ngaa apurahon ang imbestigasyon kag isuspend gilayon ang hospital payment claims nga ginakabig under investigation sa TION MISMO nga naga-reklamo man ang ospital sa utang sang Philhealth?
“In the midst sang mga reklamo sang mga ospital sa non-payment and delayed payment and denial of payment sang Philhealth, here comes Circular 2021-0013 sang Philhealth na i-implement within 15 days upon pag-publish ng paper. Ano ni siya, nagkataon lang? Naga-reklamo kami sang payment nila sa mga ospital, and here comes the circular. And I do not know if nagkataon lang, or timing lang pero it does not sound good. Ang nag-guwa… may investigation right away kag ang imo claims, ma-put on hold!,” suno kay Pedregosa.
Suno sa natungdan, kun may “fraudulent, unethical acts, ukon abuse of authority” nga amo ang ginasaad sang Philhealth, dapat nga may yara anay sang IMBESTIGASYON kag may DUE PROCESS.
‘KOMUNIKASYON’
“Tani we should be very be careful to protect this relationship. Importante ang partnership. Kabudlay kun ang isa ka partner is suffering tapos you put all the blame on him nga ang isa should also do his part!,” suno kay Pedregosa.
Kaangay sa relasyon sang mga tawo, ang relasyon sang Philhealth kag sang mga ospital ang tuman ka importante kag nagakinahanglan sang komunikasyon.
“Importante mabal-an kun paano ini ma-resolve,” suno sa natungdan.
Ini nga isyu ang ‘out in the open’: nadalahig na diri ang LGUs pati ang national government officials, magluwas sa ospital kag Philhealth.
Ginpahayag ni Pedregosa nga may yara man sang reconcilaition of record bangud kun kaisa wala nagasanto ang rekord sang ospital kag sang Philhealth.
PASALIG SANG OSPITAL
“The hospital still continues to serve. Rest assured, we will do the best that we can,” pahayag ni Pedregosa.
Sa bahin sang Philhealth nga amo subong ang ginapanawagan nga i-suspinde ang TSPC, ginpahayag ni Health Secretary Francisco Duque III, chair sang PhilHealth board, nga sila ang ‘sensitive with the plea’ kag istoryahan man ini sa ila board meeting.
