Ginbawian sang kabuhi ang isa ka misis lakip na ang ginabusong sini nga lapsag matapos nagpositibo sa COVID-19 sa Badiangan, Iloilo.
Sa interview sang Bombo Radyo kay Badiangan, Iloilo Mayor Serafin Villa, iya ginpahayag nga manugbata na ang misis sang gin-admit ini sa ospital.
Apang bangud nakitaan ini sang sintomas sang COVID-19, ginpaidalom siya sa reverse transcription polymerase chain reaction (RT-PCR) test kag didto natukiban nga positibo ini sa virus.
Ginapahayag nga nakatambong pa ang misis sa isa ka birthday party sa Janiuay, Iloilo antes ini gin-admit sa ospital.
Suno sa alkalde, posible nga sa amo nga party nalatnan sang virus ang babaye.
Ginpaidalom na sa swab test ang mga natumod nga close contact.
