Dismayado ang bana sang isa ka COVID-19 positive kag napatay nga misis sa Badiangan, Iloilo bangud sa ginapahayag pagpabaya sang mga personnel sang ospital sa banwa sang Janiuay.
Pulo ka adlaw nga nagtinir sa Federico Roman Tirador Sr. Memorial District Hospital ang pasyente nga si Ciara Gancia, 25, apang ginapahayag naglala lang ang kondisyon tubtub nga ginsaylo na sa ospital sa syudad sang Iloilo apang ginbawian gid sang kabuhi pati ang iya walo ka bulan nga ginabusong nga lapsag.
Sa interview sang Bombo Radyo kay Francis Grancia, bana ni Ciara, iya ginpahayag nga Septyembre 3 pa lang sang gindala na sa ospital si Ciara bangud nagaubo, nahilanat, kag may hapo.
Suno kay Francis, wala sang doktor nga nag-asikaso sa ila kag lunsay lang nurses nga nagakadto.
Ginpahayag man sang bana nga naghingyo siya nga ipakita sa iya ang swab test result apang nagrason ang nurse nga i-release lang ‘kun mag-gwa lang ang pasyente’. Septyembre 10, naghatag na ang doktor sang bulong nga Remdesivir. Ini, suno kay Francis, ang una nga bes nga gin-atubang sila sang doktor.
“Amo na ang pinakamasakit. Ang pag-monitor nila, tam-an ka delayed. Kis-a tawgon mo sila ala-una sa kaagahon kay gareklamo si asawahon, pero igu sila magsulod alas otso na ukon alas nueve sa aga. Kulang gid katama [ang personnel]. Kada request mo, dugay pa sila magsulod. Amo na ang pinakamasakit nga waay nanda gintatap ang asawa ko,” pahayag ni Francis.
Sang ulihi, naghingyo na ang bana kun pwede sila masaylo sa ospital sa Iloilo City apang suno sa iya, nag-rason liwat ang personnel nga ‘gutok pa ang mga ospital sa Iloilo City.’
Septyembre 13 sang gab-i, gindala na gid man sa Western Visayas Medical Center (WVMC) si Ciara apang naabriya pa ang ambulansya rason nga delayed ang byahe.
Septyembre 14 sang kaagahon, nag-abot sa ospital ang pasyente apang haluson na makaginhawa.
“Ara ko sa tupad niya. Wala na siya sang ginhambal. Nagpiyong lang siya,” suno kay Francis. Patay man ang lapsag nga amo na kuntani ang ikaduha nga anak sang mag-asawa. Gin-diretso-lubong ang mag-iloy bilang pagtuman sa protocol.
***Bukas ang Bombo Radyo sa pagpaathag sang management sang ospital.
72072064 Comments77 SharesLikeCommentShare
