Ang pagpadulong sa ospital ukon sa aton doktor ang isa lang sa pamaagi agud nga mahibaluan naton ang aton balatian ukon nabatyagan.
Sa Ohio, USA, may isa ka 19 anyos nga babaye nga nagpa-check up sa ospital sa pagpati nga may yara siya sang balatian nga appendicitis matapos nagpalanakit ang iya kilid kag likod.
Apang tuman na lang ang kakibot niya sang nahibal-an nga nagabusong siya kag lapit na lang magbata.
Siya amo si Nadia Rhoads, kag regular nga nagainom sang birth control ukon pills.
Pahayag niya, halos wala man nagahabok ang iya nga tyan kag gina-abtan pa siya sang iya menstruation kada bulan rason nga daw indi siya makapati sa natukiban sang doktor.
Sa pihak sini, normal man ang iya nangin pagbun-ag sa anak nga babaye nga may kabug-aton nga 6 pound kag 11 ounces.
Wala man si Nadia nakahanda nga mangin isa ka iloy, apang sa bulig sang iya boyfriend kag iloy, amat-amat man niya nga nabaton ang grasya nga nag-abot sa iya kabuhi.
