Suportado sang Commission on Elections (Comelec) ang plano ni Presidente Rodrigo Duterte nga maggamit sang pwersa militar para sa matalunsay nga pagpatigayon sang 2022 elections.
Suno kay Comelec spokesperson James Jimenez, nagpahanumdom na ang ila ahensya sa mga kandidato nga magapadalagan sa eleksyon nga likawan ang kinagamo kabaylo sang kadalag-an.
Ang panawagan sang presidente suno sa iya ang isa ka mabaskog nga pahanumdom para sa mga kandidato.
Pahayag ni Jimenez, kaupod ang Armed Forces of the Philippines kag Philippine National Police, ginapasigurado nila nga mangin orderly ang eleksyon sa masunod nga tuig.
Gin-athag sang natungdan nga may otoridad ang poll body nga ipatuman ang Comelec control sa pila ka bahin sang pungsod sa diin posible magluntad ang kinagamo kag mabutang sa alang-alang ang integridad sang mga presinto.
Una na nga nagpaggwa sang warning si Presidente Duterte nga indi siya magduha-duha sa paggamit sang pwersa agud mapunggan ang mga nagaplano nga manipulahon ang resulta sang eleksyon.
