Indi gihapon mag-ako si Davao City Mayor Sara Duterte-Carpio kun may matabo nga Marcos-Duterte tandem sa 2022 elections.
Suno sa presidential daughter, apisar nga nagkitaay sila ni former senator kag subong presidential aspirant Ferdinand “Bongbong” Marcos, Jr. sa Cebu City, wala pa nila naistoryahan ang ginahuring-huring nga pag-updanay sa pagpadalagan bilang presidente kag bise presidente.
Gin-athag liwat sang alkalde nga wala siya sang plano para magpadalagan sa pagka-presidente.
Suno sa natungdan, gindiskusyunan lang nila kun paano makabulig ang iya regional party — ang Hugpong ng Pagbabago — para sa presidential bid ni Marcos.
Nahibaluan nga si Inday Sara ang chair sang amo nga regional party.
Nagtunog ang huring-huring sang Duterte-Marcos tandem sang nag-post si Sara sang mga pictures nga magkaupod sila ni Bongbong kag utod sini nga si Senator Imee Marcos sang weekend.
Ginpahayag nga nag-attend sila sa birthday celebration sang asawa ni House Majority Leader Martin Romualdez, ang pakaisa sang mga Marcos.
