Nagalantaw ka man bala sang mga bantog nga Mukbang ukon “eating show?”
Sa mukbang, nagapreparar ang mga vlogger sang tuman ka damo nga pagkaon kun sa diin mabatian man ang tunog sang ila pag-usap.
Makalilingaw man ini nga mga eating show apang suno sa mga eksperto, nagakadapat likawan ang masami nga paglantaw sang mukbang bangud dako ang risgo nga mahatag sini sa ikaayong lawas.
Suno kay Sydney Lappe, registered dietician sa Missouri, ang masami nga paglantaw sa mga tawo nga nagakaon sang tuman kadamo ang maka-promote sang overeating kag poor eating habits.
Santo sa pagtuon, sa sulod sang 21 ka adlaw nga paglantaw sang isa ka indibidwal sa mga vlogger nga nagakaon sa atubang sang camera, natukiban nga naga-form sang poor eating habit ang tumalan-aw.
Pahayag sang dietician, dako ang psychological effect sang paglantaw sa mga tawo nga nagakaon sang madamo bangud nagaresulta ini sa pag-overeat sang tumalan-aw gani nagasaka man ang risgo sa pag-angkon sini sang weight-related health kaangay sang type 2 diabetes kag heart disease.
