ILOILO CITY- Nagasalalampaw nga kaso ang atubangon sang rapper nga si Travis Scott kag iban nga organizers sang Astroworld music festival sa Houston kasunod sang stampede nga ginkamatay sang walo ka tawo kag ginkapilas sang ginatos ka iban pa.
Isa sa mga nagpasaka sang kaso amo si Kristian Paredes, 23 anyos sang Austin, Texas.
Ang kaso nagaakusar kanday Travis Scott, recording artist Drake, show producer nga Live Nation Entertainment Inc., kag Harris County Sports and Convention Corporation bangud sa negligence.
Magluwas diri, nagahingyo man ini sang masobra sa million dollars nga bayad kag suno sa iya, mismo ang rapper nagtulod sa mga tawo nga magdinaguso nga nagresulta sa pagkapatay kag pagkapilas sang mga tumalan-aw.
Suno kay Bombo International Correspondent Rufino Pinoy Gonzales direkta sa Texas,USA , ginalauman nga mas madamo pa ang magapasaka sang kaso sa masunod nga mga inadlaw bangud sa ginakabig “pinakamakamamatay” nga music event.
