Temprano nga gin-adjourn ang plenary session sa Kamara sa tunga sang huring-huring nga may ouster plot batok kanday Speaker Lord Allan Velasco kag Majority Leader Leyte Representative Ferdinand Martin Romualdez.
Taktika sa House leaderships nga i-adjourn ang session sang mas temprano ukon likawan gid nga magpatigayon sang regular sessions kun may napanimahuan nga ouster plan.
Una nga nagpaguwa sang statement si Romualdez nga wala siya sang tuyo nga pahalinon sa pwesto si Velasco bangud sandig sa alegasyon, siya ang nagapanguna sa plano nga pahalinon si Velasco.
Nagrason pa si Romualdez nga ang focus niya subong amo ang kandidatura sang ila standard-bearer sa Lakas-CMD nga si Davao City Mayor Sara Duterte-Carpio nga magapadalagan sa pagka-bise presidente sa 2022 elections.
Sang ulihi, may plot twist bangud nag-guwa ang impormasyon nga indi lang si Velasco ang tuyo sang ouster plot kundi pati si Romualdez.
Si Velasco kag Romualdez ang lunsay suod nga supporters ni Sara Duterte.
Kun basehan ang numero sang mga mamalidha sa Kamara, halos 70% sa mga ini ang halin sa PDP-Laban — numero nga may potensyal nga islan ang liderato sa lower house.
Ang PDP-Laban amo subong ang ruling party ukon partido ni Presidente Rodrigo Duterte.
Una diri, gina-alegar nga may natabo nga indi paghangpanay sa tunga sang mga Duterte bangud sa desisyon ni Sara nga magdalagan sa pagka-bise presidente sa idalom sang Lakas-CMD party.
Bangud sang ginhimo sang presidential daughter, nag-isol sa vice presidential race si Sen. Bong Go, vice presidential bet sang PDP-Laban kag close aide sang amay nga Duterte.
Ang natabo: nagpadalagan si Go sa pagka-presidente sa idalom sang lain nga partido.
Makasumpong ni Go si former Sen. Bongbong Marcos nga amo ang runningmate ni Sara Duterte sa eleksyon.
Ginapahayag nga gina-target nga pahalinon si Velasco bangud suod ini nga kaalyado ni Sara Duterte kag ginbuligan pa sini si Sara nga magkampanya para sa Hugpong ng Pagbabago senatorial candidates sang 2019.
Sa pihak nga bahin, pakaisa naman ni Marcos si Romualdez kag kun matandaan, nakaupod pa si Romualdez sa Cebu City agud nga makaistoryahanay sanday Sara kag Bongbong.
Wala pa sang statement halin kay Velasco as of press time. ## — with reports from Manila Bulletin, Inquirer
