Ginplastar ni Philippine ambassador to the Holy See Myla Grace Macahilig ang pila sa iya tutukan nga mga programa kag concerns kasunod sang iya opisyal na nga pag-umpisa sang iya katungdanan sa Vatican City — ang iya “first posting” bilang ambassador.
Sa interview sang Bombo Radyo sa 55-anyos nga Ilongga, iya ginpahayag nga lakip diri ang ‘pag-alalay’ sa mga programa kag isyu kaangay sang nagahilapit nga posible pag-angkon sang Pilipinas sang isa pa ka saint.
Nahibaluan nga ang candidate sa sainthood nga si Cebuano Archbishop Teofilo Camomot ang nakabaton na sang green light agud ma-deklarar nga “Venerable” nga amo ang first major step antes ang canonization.
Ginkilala sang damlag lang sang Vatican theological commission si Camomot nga may yara sang “heroic virtues” rason nga nakaangkon sang “unanimous affirmative vote” nga nagkabuhi ini sandig sa Catholic principles.
Iga-examine sang commission sang bishops kag cardinals ang kawsa sa pag-deklarar sa iya bilang santo antes ini i-sumite kay Pope Francis para sa approval.
Suno pa kay Macahilig, may himuon man nga mga formal arrangements may kaangtanan sa credentials sang mga Filipino priests nga didto nag-gradwar sa Roma.
Sa patag sang kultura, maga-partner ang embahada sa Filipino communities sa amo nga lugar agud nga mapakilala ang bugal sang Pilipinas sa mga tawo sa Italya.
Ginpahayag ni Macahilig nga ‘doble-grasya kag milestone’ ini para sa Pilipinas bangud ini ang ika-500 nga anibersaryo sang pag-abot sang Kristyanismo sa Pilipinas kag subong man nga 2021 amo ang ika-70 nga tuig sang pag-establisar sang diplomatic relations sa tunga sang Pilipinas kag sang Holy See. ##
