Nagpangulihot liwat ang Pilipinas sa international index nga nagatakos sang resilience sa mga pungsod sa tunga sang COVID-19 pandemic.
Sandig sa COVID Resilience Index sang Bloomberg para sa bulan sang Nobyembre, ika-53 out of 53 countries ang Pilipinas.
Gin-rank ang mga pungsod base sa kun daw ano ka-epektibo gin-handle ang virus “with the least social and economic upheaval.”
Gintawag sang Bloomberg ang ila listahan nga, “The Best and Worst Places to Be as Winter Meets Omicron.”
Lakip man sa 12 ka data indicators sa amo nga index amo ang virus containment, quality of healthcare, vaccination coverage, overall mortality kag pag-uswag may kaangtanan sa pagpahanugot liwat sa mga byahe. Ginlantaw man ang vaccine doses per 100 people, lockdown severity, flight capacity, kag vaccinated travel routes.
Nagpanguna sa listahan ang United Arab Emirates, nga suno sa Bloomberg, “has basically normalized back to pre-pandemic life.”
Dala man sa Top 5 ang Chile, Finland, Ireland kag Spain.
Ang bottom 5 naman amo ang Poland, Malaysia, Vietnam, Indonesia kag Pilipinas.
Consistent ang Pilipinas nga bottom-dweller sa international rankings sa COVID response — pagtuon nga gintawag na sang Malacañang nga “biased.”##
