Nag-depensa ang Sugar Regulatory Administration (SRA) nga ang desisyon sini nga pahanugutan ang pag-import sang kabug-usan nga 200,000 metric tons (MT) sang kalamay ang naangot sa ginalantaw nga kakulangan sa suplay kun manughingapos na ang milling season.
Sa isa ka statement, ginpahayag ni SRA administrator Hermenegildo Serafica nga nag-desisyon ang board nga pasugtan ang importation bangud ginkonsiderar ang pagnubo sa ending balance sang refined sugar. Sa iga-import nga kalamay, 100,000 MT ang standard grade refined sugar kag 100,000 MT ang bottlers’ grade refined sugar.
Suno kay Serafica, gin-assess man sang SRA ang nangin halit ni Bagyo Odette sa sugarcane crops kag ginlantaw man ang sugar stocks sa warehouses amo man ang facilities kag equipment sang sugar mills kag refineries sa nagapanguna nga sugar milling districts.
Kasunod sini, ginbutang sang SRA ang ila nga pre-final crop estimate sang raw sugar production sa 2.072 million MT nga mas manubo ipaanggid sa nauna nga projection nga 2.099 million MT.
Sandig sa ginpa-guwa nga data sang Department of Agriculture-Disaster Risk Reduction and Management Operations Center, ang halit sang bagyo sa tubo ang naglab-ot sa P1.15 billion ukon 8.6 percent sang kabug-usan nga agricultural damage.
Gin-revise man sang Philippine Association of Sugar Refineries ang ila nga refined sugar production forecast para sa current crop year. Ginbutang ini sa 16.748 million 50-kilo bags (LKg), manubo halin sa initial production estimate nga 17.572 million LKg.
Ang crop year ang magaumpisa sa Septyembre 1 kag maga-tapos sa Agusto 31 sa masunod nga tuig.
Ginpaathag man sang SRA nga ang sugar mills kag refineries ang naga-untat sang operasyon sa bulan sang Mayo tubtub sa Hunyo, kag maga-umpisa naman sa operasyon para sa next season sa Septyembre tubtub sa Oktubre.
Ang refineries naman ang magaumpisa sang operasyon duha ka semana matapos ang mills.
Suno sa SRA, ang 200,00 MT sang refined sugar imports amo ang maga-cover sa supply shortfall kag amo ang magahatag sang bastante nga buffer stock sa pungsod nga maka-sustain tubtub sa pag-umpisa naman sang bag-o nga milling season.
Ang pagpatuman sang sugar import program ang naangot sa direktiba sang Department of Agriculture (DA) agud nga ma-temper ang nagasaka nga presyo sa kalamay sa local market. ## –with reports from Philstar
