Ginpanindugan sang embahada sang Estados Unidos sa Pilipinas nga wala sang kahilabtanan sa eleksyon ang poster nga ginpa-guwa sang US-Federal Bureau of Investigation (FBI) nga naga-tag kay Pastor Apollo Quiboloy bilang WANTED sa amo nga pungsod.
Paathag sang US Embassy, ang poster nga gin-isyu sang FBI ang kasunod sang pila ka tuig nga pagpangabudlay sang mga tawo nga nagapatuman sang layi, kag wala sang anuman nga labot sa May 2022 elections sa Pilipinas.
“The FBI’s release of a wanted poster for Kingdom of Jesus Christ founder Pastor Apollo Quiboloy follows a multi-year effort by law enforcement. It is unrelated to the Philippines’ ongoing presidential election campaign,” suno kay US Embassy in Manila spokesperson Heather Fabrikant.
Matandaan nga sang Sabado gin-release sang FBI ang “wanted” posters para sa megachurch leader nga si Quiboloy kag sa duha ka iban pa nga myembro sang simbahan bangud sa ginapahayag nga sex trafficking charges. \
Kasunod sini, nagwangal ang kampo ni Quiboloy paagi sa legal counsel sini nga si Atty. Ferdinand Topacio nga nagsiling nga ginpa-guwa ang posters bangud nagahilapit na ang piniliay sa Pilipinas.
Si Quiboloy ang kilala nga suod kay Presidente Rodrigo Duterte. Sang damlag lang, gin-publicly endorse man sini sanday presidential candidate Bongbong Marcos kag ang running mate nga si Sara Duterte lakip na ang ila nga senatorial slate. #
