Ginbasura sang korte sa Asingan, Pangasinan ang kaso nga pagpangawat sang mangga nga ginpasaka batok sa 80-anyos nga si Leonardo Flores ukon Lolo Narding.
Matandaan nga gin-aresto si Lolo Narding bangud sa gin-alegar pagkuha sini sang 10 ka kilo sang mangga sa Asingan, Pangasinan sang Enero 13, 2022.
Nangin viral ang kaso sini bangud ginpahayag man ni Lolo Narding nga ginpuksi sini ang mga mangga bangud tanum niya ini. Kabahin sang viral statement sang tigulang nga gin-quote sang PIO, “Pinapitas ko ’yung isang puno ng manga wala pang sampung kilo, ang alam ko sakop namin. Noong binakuran nila, sinakop naman na nila pero tanim ko naman ’yun.”
Si Robert Hong ang nagpasaka sang kaso kay Lolo Narding. Gin-alegar sini nga 10 ka kaing ang ginkuha sang tigulang, baliskad sa report nga 10 ka kilo lang.
Sa nangin statement naman ni Public Attorneys Office (PAO) Chief Persida Rueda-Acosta, ginpakita sini ang complainant’s affidavit of desistance nga napetsahan Pebrero 8, 2022.
“Mabuhay hustisya! Congrats Atty. Fernandez of PAO Urdaneta District!,” kabahin sang post ni Acosta.
