Ginbasura sang First Division sang Commission on Elections (COMELEC) ang consolidated disqualification cases nga gin-file batok kay presidential candidate Ferdinand ‘Bongbong’ Marcos Jr.

Suno kay Comelec spokesman James Jimenez, gin-dismiss ang mga petitions bangud sa kakulang sa merito.

Ini ang ginpang-file sang martial law survivors paagi kay Bonifacio Ilagan, National Commission on Muslim Filipinos Commissioner Abubakar Mangelen, kag sang partylist group nga Akbayan.

Ang mga nag-desider sa amo nga mga kaso amo sanday Commissioner Aimee Ferolino nga amo ang ponente ukon ang nagsulat sang desisyon kag ang isa pa amo si Commissioner Marlon Casquejo.

Matandaan nga gintuyo sang amo nga mga grupo nga i-disqualify si Marcos sa presidential race sa May 9, 2022 bangud sa iya nga conviction sa failure nga mag-file sang income tax returns halin sang 1982 tubtub sa 1985.

Suno sa petitioners, perpetually disqualified na si Marcos nga magpadalagan para sa public office.

Apang sandig sa ruling sang First Division, ang penalty nga perpetual disqualification ang indi pwede ma-apply sa sini nga kaso.

Ginpahayag man sang division nga wala sang nakit-an nga crime of moral turpitude sa bahin ni Marcos.

Gindayaw naman sang kampo ni Marcos ang desisyon sang COMELEC, apang baliskad naman ang reaksyon sang petitioners.

Ginpahayag sang petitioners nga i-exhaust nila ang tanan nga legal remedies kag iga-apelar ang desisyon sa COMELEC omelec en banc.

Ang apelar ang mahimo man nga mapasaka sa Korte Suprema para sa pinal nga desisyon.

Magluwas sa sini, may isa pa ka disqualification case nga gin-file batok kay Marcos nga pending pa subong sa Second Division sang COMELEC.