Nagtambong pa liwat sa training session ang 15-anyos nga Russian figure skating sensation nga si Kamila Valieva apisar nga ini ang sentro sang latest drug testing scandal sa Winter Olympics sa Beijing, China.
Antes ang paglupok sang kontrobersiya, si Valieva ang nakahimo na sang maragtas bilang first female skater nga naka-land sa quadruple jump sa Olympics.
Siya man ang heavy favorite nga makadaog sang gold medal sa women’s individual event sa masunod nga semana.
Matandaan nga ang team nanday Valieva ang nagdaog sang gold medal sa isa ka team event subong nga semana apang gin-delay ang awarding ceremony bangud ginpahayag nga nagpositibo ang amo nga skater sa drugs nga ginadumilian sa Olympics.
Ang amo nga positive test ang posible mangin rason nga bawion sa Russia ang gold nga nadag-an kag threat man sa partisipasyon ni Valieva sa individual event sa masunod nga semana.
Ginpahayag nga sang Disyembre pa gin-take ang drug test apang subong lang nga semana naguwa ang report.
Sandig pa sa report, ang na-trace nga drug amo ang trimetazidine, isa ka metabolic agent nga ginagamit para sa treatment sang angina kag vertigo nga gina-ban sang World Anti-Doping Agency bangud makapadasig ini sa blood flow efficiency kag makabulig man sa endurance sang tawo.
Si Valieva kag ang iya nga teammates ang wala naga-compete para sa Russia kundi sa idalom sang Russian Olympic Committee.
Ini bangud pormal nga gin-ban sang 2019 WADA ang Russia nga mag-compete sa major sporting events sa nadiskubrehan nga lapnagon kag state-sponsored nga doping ukon paggamit sang sang ginadumilian nga substances para sa hinampang.
