May kinamatarong ang non-candidates ukon pribado nga mga indibidwal sa pag-post sang campaign materials sa ila private properties bisan ano man ini kadako ukon kagamay.
Matandaan nga 2015 sang ginpaboran sang Korte Suprema ang kontrobersyal nga kaso sang Diocese sang Bacolod kun sa diin ang tanan nga indibidwal nga wala nagapadalagan sa eleksyon, may kinamatarong sa pag-post sang campaign propaganda bangud indi ang mga ini sakop sang regulasyon sang Commission on elections (COMELEC).
Nahibaluan nga matunog subong ang isyu nga ginpakamalaut sang supporters ni Vice President Leni Robredo ang COMELEC matapos ginpangkakas sang poll body ang campaign materials nga gin-post sang volunteers sa ila nga mga pribado nga propiedad.
Apang depensa sang COMELEC, bisan sa pribado nga property, subject sa ila regulasyon ang pagpangkumpiska sang campaign materials.
Sa interview sang Bombo Radyo kay Atty. Emilio Marañon II, iya ginpahayag nga sandig sa desisyon sang Korte Suprema, ‘freedom of expression’ sang non-candidates ang pag-post sang campaign materials sa ila private properties sa kondisyon nga — ‘kaugalingon nga effort’ sang mga ini ang pagsuporta sa isa ka kandidato.
Buot silingon, wala sila nagpasugo sa kandidato nga ila ginasuportahan kag halin sa kaugalingon nila nga bulsa ang ginpangtapik nga posters.
Suno sa abogado, ginpahayag man sang Korte Suprema nga bisan abusuhon sang isa ka private individual ang ini nga ‘freedom of expression,’ indi ini rason agud idingot sa tanan ang ila kinamatarong sa ‘freedom of expression.’
