ILOILO CITY- Asud-asod na nga pagsigabong ang nabatian sang mga tawo sa pila ka syudad sa Ukraine.
Ini kasunod sang pag-anunsyo ni Russian President Vladimir Putin sang military operation sa Ukraine agud depensahan ang mga separatists sa nasidlangan nga bahin sang pungsod nga ginatawag nga Donbas region.
Sa statement sang Ukrainian interior ministry, gina-target sang rocket attacks sang Russia ang Ukrainian fighter jets sa airport sa gwa sang Kyiv, ang kapital sang Ukraine.
Pahayag naman sang state emergency service, ginlunsar ang mga atake batok sa 10 ka Ukrainian regions, ilabi na sa east kag south sang pungsod.
Sa interview sang Bombo Radyo kay Bombo International Correspondent Joy Tolentino direkta sa Ukraine, iya ginpahayag nga isa siya sa madamo nga mga tawo sa Kyiv,ang capital city sang Ukraine, nga nagbiya na sa syudad agud magpadulong sa mga lugar nga malayo sa mga area nga mahimo malab-ot sang Russian invasion.
Suno kay Tolentino, kada 20 tubtob 30 minutos, mabatian ang matunog nga paglinupok sang missile.
Kasunod sang pagsalakay sang Russia, gilayon naman nga nagpaandam si US President Joe Biden sang konsekwensiya para sa Russia kag ginsiling nga dako ang salabton sang Russia bangud sa nangin tikang sini nga pat-ud nga magaresulta sa kamatayon sang madamo nga tawo kag pag-antos sang katawhan.
Suno naman sa secretary general sang North Atlantic Treaty Organization nga si Jens Stoltenberg, magatingob ang mga magkaalyado nga pungsod agud nga atubangon ang posible resulta sang agresibo nga tikang sang Russia.
