Gina-engganyo sang gobyerno ang mga empleyado nga magbalik na sa trabaho sa office nga setup agud mabatak ang ekonomiya sang pungsod.
Ini ang kasunod sang pagpaidalom sa alert level 1 sa 38 ka mga lugar sa pungsod kasubong sa Metro Manila.
Ginpahayag ni Department of Trade and Industry Secretary Ramon Lopez kadungan sang Talk to the People ni Presidente Rodrigo Duterte nga ginaduso nila ang pagbalik na sa opisina ukon ang on-site work arrangement.
Apang gin-athag ni Lopez nga magapabilin nga optional ang ” work from home” setup.
Matandaan nga humalin sang gindeklara ang COVID-19 pandemic sang Marso 2020, ginpaidalom sang gobyerno ang pungsod sa enhanced community quarantine, pinaka-istrikto nga sahi sang lockdown.
Ginsuspende ang tanan nga klase kag school activities sa tanan nga lebel kalakip na ang pagpatigayon sang mass gatherings.
Ginpatigayon man ang tanan nga trabaho sang government kag private offices pinaagi sa work from home arrangement.
