Dal-on sang Iloilo Provincial Government ang Covid-19 vaccines pati sa mga transport terminals kag construction sites sa probinsya agud lamang nga mapasaka pa ang vaccination rate.
Kabahin ini sang paglunsar sang People Power Resbakuna nga amo ang tikang sang probinsya nga bukas para sa mga indibidwal nga maga-avail sang primary doses kag booster shots.
Sa interview sang Bombo Radyo kay Iloilo Governor Arthur Defensor, Jr., iya ginpahayag nga may yara pa sa gihapon sang pagpang-alang alang ang publiko rason nga apisar lain-lain na ang nangin estratehiya sang probinsya, mahinay gihapon ang rollout sang bakuna sa first dose.
Ang Provincial Health Office (PHO) ang may yara sang mga vaccination sites sa transport terminal sa Barangay Ungka II, Pavia, Iloilo malapit sa isa ka daku nga mall sa amo nga banwa kun sa diin mahimo makabaton ang mga commuters sang first ukon second vaccine doses ukon booster shots.
Ini man ang luyag sang gobernador nga himuon sa iban nga bahin sang Iloilo Province agud nga mangin mahapos na para sa publiko.
Sa latest data sang Iloilo PHO, yara pa lang sa 65% ang vaccination rate sa probinsya para sa mga nakabaton na sang second dose sang bakuna.
