Maga-apply ang Iloilo City Government sa Commission on Elections (Comelec) agud hingyuon nga ma-exempt sa public works ban ang pagtukod sang tatlo ka bag-o nga mga merkado sa syudad.
Una na nga nagpa-guwa sang abiso ang Comelec nga maga-umpisa ang ban sa public works sa Marso 25 kag magatakop sa Mayo 8 subong nga tuig.
Ginapatuman ini nga ban agud nga malikawan nga gamiton sang mga pulitiko ang pondo sang gobyerno para sa pagpangampanya may kaangtanan sa May 2022 national and local elections.
Covered sa sini nga ban ang disbursement, paggasto, kag ang construction activity.
Samtang, sa syudad sang Iloilo naman, ginapanan-aw nga ma-isyu na sa masunod nga bulan ang Notice to Proceed sa mga kontraktor nga magapangamot sa pag-rehabilitate sang mga merkado sa Jaro (Big), Lapaz, kag Arevalo.
Ang Notice to Proceed amo ang petsa nga ginahatag kun san-o makaumpisa ang contractor ukon subcontractor sa pagtrabaho sa construction project.
Sa interview sang Bombo Radyo kay Atty. Quintin Magsico, vice chairman sang Bids and Awards Committee sang Iloilo City Government, iya ginpahayag nga gina-evaluate na lang subong ang detailed architectural and engineering design.
Kun masumite na ini nga design sa committee kag maaprubahan, i-incorporate ini sa kontrata kag mangin basehan sa pagpatuman sang proyekto kag sunod na nga iga-isyu ang Notice to Proceed.
Una diri, ginpahayag naman nga nga estimated budget sa pagkay-o sa Lapaz Market ang yara sa P395 million; yara man sa P395 million ang pondo sa Jaro (Big) market, kag P150 million para sa merkado sa Arevalo.
Kuhaon ini nga pondo sa P1.7 bilion loan package sang Iloilo City Government.
