Ginmanduan ni Presidente Rodrigo Duterte ang mga ahensya sang gobyerno nga hatagan sang atensyon ang pagsaka sa presyo sang produktong petrolyo bangud sa nagapadayon nga kinagamo sa tunga sang Russia kag Ukraine.
Suno kay Senator Bong Go, naghatag na sang instruction si Presidente Duterte sa National Economic and Development Authority (NEDA), Department of Energy (DOE), Department of Trade and Industry (DTI), Department of Finance (DOF), kag sa Department of National Defense (DND) nga tutukan ang oil price hike sa pungsod.
Una na nga ginpahayag ni Energy Secretary Alfonso Cusi nga wala sang kakulang sa suplay sang langis sa Pilipinas apang gina-ekspektar na ang padayon nga pagsaka sang presyo sini.
Madamo naman sa mga apektado nga grupo ang nagapanawagan nga isuspende ang excise tax sa mga produktong petrolyo.
Sa subong, ginmanduan na ni Duterte ang kongreso nga i-review ang deregulation law sang pungsod.
