Napasa na sang Department of the Interior and Local Government (DILG) Iloilo Province sa DILG Central Office ang listahan sang tricycle drivers nga qualified nga makabaton sang fuel subsidy sa Probinsya.
Sa interview sang Bombo Radyo kay Teodora Sumagaysay, direktor sang DILG Iloilo Province, iya ginpahayag nga ila nabaton ang memorandum angut sa fuel subsidy naghalin sa DILG central office sang Marso 17 kag gilayon man nga ila ginpadala sa tagsa ka banwa sa Probinsya.
Suno kay Sumagaysay, 100% sa mga banwa ang nakapasa sang listahan sang ila tricycle drivers sa deadline sang Marso 19.
Wala man suno sa natungdan gintumod kun ang may prangkisa lang ang makabaton sang ayuda ukon nalakip sa listahan ang mga kolorum nga tricycle drivers.
Kabug-usan nga 39, 412 ang inisyal nga numero sang mga tricycle drivers nga napasa na sa DILG central office.
Wala pa nahibaluan kun san-o mabaton sang drivers ang ila nga fuel subsidy.
