Imposible para kay presidential candidate Senator Manny Pacquiao nga maga-isol siya sa 2022 presidential race, apang ginbuyagyag man sini ang pangalan sang kandidato nga iya suportahan kun hinali nga ‘may sign halin sa Diyos’ nga magatulod sa iya nga mag-withdraw siya sa eleksyon.
Sa exclusive interview sang Bombo Radyo kay Pacquiao, ginpahayag sini nga ang iya kaupod sa Senado nga si Senador Panfilo ‘Ping’ Lacson sng iya nga suportahan kun matabo gid man nga maisol siya sa iya nga presidential bid.
“Malabong mangyari yan (na mag-withdraw sa presidential race), pero kung sakali na magbigay ng sign sa akin ang Panginoon, then si Lacson, mas okay pa. Istrikto, matigas na lider, at mabusisi din pagdating sa budget ng Pilipinas,” suno kay Pacquiao.
Pag-abot sa iya pilion nga bise-presidente, kun mag-isol man ang iya runningmate nga si Buhay Representative Lito Atienza, ginpahayag ni Pacquiao nga si Senate President Vicente Sotto III ang iya nga suportahan. Si Sotto amo man ang runningmate ni Lacson.
Mismo si Atienza ang una nga nagpahayag nga si Sotto ang iya nga luyag nga magbulos bilang runningmate ni Pacquiao kun mag-withdraw siya sa vice-presidential bid.
Ginkumpirma man ni Pacquiao sa Bombo Radyo nga maga-istoryahanay sila ni Sotto tuhoy diri. ##
