ILOILO CITY – Nag-request na sang listahan sang mga accredited nga trucking companies ang Public Safety and Transportation Management Office (PSTMO) sa Philippine Ports Authority (PPA) agud nga masapol sang opisina angut sa padayon nga problema sa naga-parking nga mga trailers kag truck sa higad sang dalan nga ginatuna-an sang mga vehicular accidents.
Ang mga dalan nga may yara sang naka-park nga mga dalagko nga truck amo ang halin sa Brgy. Magsayay, Lapuz padulong sa Brgy. Baldoza La Paz.
Sa interview sang Bombo Radyo kay Mr. Jeck Conlu, pinuno sang PSTMO, iya ginpahayag nga sapulon nila ang tanan nga trucking companies kag ipaathag nga dapat nga mag-park sa ila tagsa ka garahe kag indi sa kilid sang dalan.
Dugang pa ni Conlu, wala sang regular nga traffic enforcer nga nagabantay sa lugar apang may yara sang isa ka patrol ang PSTMO nga nagalibot.
Pahayag dugang ni Conlu nga ang mga trucking nga naga-park sa kilid sang dalan ang ginabilin lamang sang mga driver kun hapon kag ginabalikan kun aga rason nga wala sang may maabtan nga driver kag wala sang issue-han sang citation ticket.
Sa subong suno kay Conlu, wala pa nakapa-renew sang deputization ang PSTMO sa Land Transportation Office (LTO) agud nga makabalik na sang pagpangdakop sa mga nagalapas sa traffic violation.
