ILOILO CITY – Ginalauman nga magdagsa ang mga overseas Filipino Workers sa una nga adlaw sang overseas absentee voting subong nga adlaw sa Kuwait.
Ang overseas absentee voting ang masugod subong nga adlaw, April 10 kag magatakop sa May 9.
Suno kay Bombo International Correspondent Oliver Tupas Diong, Chairman sang Coalition of Filipino Community Organization in Kuwait, iya ginpahayag nga base sa eksperyensya niya, madamo nga mga OFW ang nagaboto sa una nga adlaw kag malaka na sa ikaduha tubtob sa ikaduha nga semana.
Ginalauman nga magdamo naman ang maboto sa ulihi nga tatlo ka adlaw sang pagbinotohay.
Samtang, well-informed na ang mga OFW sa Kuwait kag preparado na ang embahada suno kay Diong.
Suno kay Diong, ang election ang magasugod las-otso sa aga tubtob las-kwatro sa hapon.
Sa pagboto, kinahanglan nga magdala sang ID ukon passport.
Sa Kuwait, masobra sa 100, 000 ang mga Pilipino ang rehistrado sa kabug-usan nga masobra 200, 000 nga mga Pilipino sa amo nga pungsod.
