ILOILO CITY – Posible nga indi madayun ang election sa mga lugar nga may surge sang COVID-19.
Suno kay Department of Health (DOH) Secretary Francisco Duque III, iya ginpahayag nga may posibilidad nga indi madayun ang eleksyon sa mga lugar nga may mataas nga kaso apang basehan sa gihapon ang alert leveling system.
Kung yara sa alert level 2 ang isa ka lugar, may mga limitasyon sa mga public spaces kag may yara lang sang mga aktibidad nga mahimo nga mapahanugutan.
Ang alert level ang nakadepende sa tatlo ka metric system– ang pagtaas sang two-week growth rate, average daily attack rate kag health care utilization rate.
Ginklaro ni Duque nga base sa mga experts, ang sunod nga surge sang COVID-19 ang matabo pa sa tunga-tunag sang Mayo.
Ginpanugyanan man ni Duque ang mga botante nga kun may sintomas sa adlaw sang eleksyon, magtinir nalang sa balay agud nga malikawan ang paglapta sang infection.
Padayon ang pagpakig-angot sang DOH sa Commission on Elections agud nga masabat ang madamo nga mga pamangkot.
Samtang, suno naman kay COMELEC Commissioner George Garcia, ang postponement sang eleksyon ang matabo gid lamang sa mga sitwasyon nga may terorismo, kinagamo, pagkaguba sang election paraphernalia kag iban pa nga indi mapunggan kag wala ginalauman nga matabo.
