ILOILO CITY- Gina-engganyo sang Commission on Elections (COMELEC) ang mga pumuluyo nga mangisog nga i-report ang nagakatabo nga vote-buying sa ila lugar.
Ini kasunod man sang mga reports sa lapnagon nga vote-buying sa nanuhay-tuhay nga banwa sa Iloilo.
Sa interview sang Bombo Radyo kay Atty. Ian Lee Ananoria, Director sang Iloilo Provincial COMELEC Office, iya ginpahayag nga madamo sang pamaagi agud nga i-report ini.
Suno kay Ananoria, mahimo nga mag-file sang complaint sa Office of the Election Officer ukon sa Fiscal.
Pahayag sang natungdan, sa pag-file sang kaso, mahimo nga magpabulig sa Philippine National Police (PNP) ukon sa Integrated Bar of the Philippines (IBP).
Suno pa sa iya, may yara man sang Legal Network for Truthful Elections (LENTE) nga sarang maghatag sang legal assistance sa sin-o man nga nag-file sang complaint.
Dugang niya, mahimo man nga ipalab-ot ini nga reklamo sa Task Force Kontra Bigay paagi sa pagpadala sang mensahe sa facebook sang task force.
Angot naman sa mga reported nga kaso sang vote-buying sa Iloilo, ginpahayag niya nga wala pa sang formal complaint nga na-file sa ila opisina.
