ILOILO CITY – Ang Korte Suprema na ang maga-desisyon sa tion nga ma-disqualify si former senator Ferdidand “Bongbong” Marcos Jr. sa pagka-presidente sang pungsod Pilipinas.
Ini ang suno kay Commission on Elections (COMELEC) Commissioner George Garcia.
Subong nga adlaw ginpasalig ni COMELEC Chairman Saidamen Pangarungan nga ipagwa ang resulta sang appeal sa ginbasura nga disqualificaton case batuk kay Marcos.
Sa KBP- Bombo Radyo… Quick Count Partial Unofficial Results, nagapanguna si Marcos sa presidential race.
Suno kay Garcia, ang makasabat gid lamang sang nasambit nga isyu amo ang Korte Suprema.
Ginpasigurado ni Garcia nga makalab-ot gid sa Korte Suprema ang desisyon sang COMELEC en banc angut sa kaso ni Marcos kag kung may yara man sang isyu angut diri, ang Korte Suprema na ang bahala nga magsabat.
Kung madumduman, ginpahayag ni Chairman Saidamen Pangarungan ang ruling sa tatlo ka mga kaso ang napirmahan na apang ginhulat pa ang promulgation sang ikaapat nga kaso nga naulihi nga naka-abot sa poll body.
Ang mga petition ang gin-file sang lideres sang Akbayan party-list, Partido Federal ng Pilipinas (PFP), Campaign Against the Return of the Marcoses and Martial Law (CARMMA), kag Pudno Nga Ilokano (Ang Totoong Ilokano) nga nagapanawagan sa COMELEC En Banc nga i-reconsider ang ginbasura nga desisyon angut sa disqualification case batuk kay Marcos.
Ang pinakaulihi nga kaso ni Marcos ang ginbasura sang First Division sang COMELEC sang Abril 20 bangud sang kakulang sang ebidensya.
Samtang, kampante naman ang kampo ni Marcos nga ibasura liwat sang COMELEC ang disqualification cases batuk sa iya.
Suno kay Atty. Vic Rodriguez, spokesperson ni Marcos, wala sang basehan nga magbag-o pa ang desisyon sang poll body.
