ILOILO CITY- Wala sa gihapon sang ginauyatan nga alcohol breath analyzer ang Iloilo City Police Office agud ila magamit kuntani sa imbestigasyon sa mga nagaluntad nga aksidente bilang pag-enforce sang Anti Drugged and Drunk Driving Law.
Pinaagi sa amo nga device, ma-determinar kun nakainom sang makahulubog nga ilimnon ang isa ka driver nga involved sa aksidente kag mahimo magamit nga ebidensya sa tion sang pagpasaka sang kaso.
Sa interview sang Bombo Radyo kay PCol Leo Batiles, director sang ICPO, iya ginpahayag nga apisar nga may 30 ka na ka mga personnel sang ICPO nga deputized sang Land Transportation Office (LTO) sa paggamit sang alcohol breath analyzer sa pagpatigayon sang imbestigasyon sa mga road accident,apang wala man sila sang ginauyatan nga device.
Suno kay Batiles, nagpasalig naman ang LTO nga magapahulam sila sa ICPO sang 2 sa ila 6 ka breath analyzers apang wala ini sa gihapon na-turn over sa ila.
