ILOILO CITY- Gin-athag sang Iloilo Provincial Health Office (PHO) nga indi hospital-acquired ang narekord nga duha ka local cases sang Omicron sub-variant BA.2.12.1 sa Region 6.
Base sa data sang Department of Health (DOH) Region 6, ang duha ka local cases ang ginalakipan sang isa ka 69-anyos nga lalaki nga taga-Pavia samtang ang isa ka local case amo ang isa ka 66-anyos nga lalaki nga taga- Zarraga.
Sa interview sang Bombo Radyo kay Dr. Ma Socorro Quinon, head sang PHO, iya ginpahayag nga bag-o pa man na-admit sa ospital ang mga pasyente, ginpaidalom sila sa RT-PCR test kag didto pa nakumpirma nga positibo sila sa Omicron sub-variant.
Suno kay Quinon,admitted pa ang duha ka mga pasyente apang natalana naman nga i-discharge.
Dugang niya, lunsay bakunado ang duha ka mga pasyente gani nga mild symptoms lang ang ila naeksperyensiyahan.
Nahibaluan nga magluwas sa duha ka local cases, isa ka 60-anyos nga babaye nga returning overseas Filipino (ROF) gikan sa Estados Unidos ang infected man sang nasambit nga variant.
Gin-tag na nga “recovered” ang ROF nga fully vaccinated naman batok sa COVID-19.
