ILOILO CITY- Ginakabig nga dako nga development sang Iloilo Police Provincial Office (IPPO) ang pagsurrender na ni Raffy Sorioso, isa sa tatlo ka mga suspects nga nakitaan sang probable cause nga pasakaan sang kaso nga murder sa likod sang pagpatay sa negosyante nga si Claire Diergos.
Sa interview sang Bombo Radyo kay PSMSGT Francisco Lindero Jr., spokesperson sang IPPO, iya ginpahayag nga kasunod sang pagsungka ni Sorioso kag sang isa pa ka suspek nga si Rudelyn Sumbong, mas makakuha ang otoridad sang importante nga mga impormasyon agud magamit nga ebidensya batok sa iban pa nga mga personalidad nga ginatudlo nga may kaangtanan sa krimen apang wala nadutlan sang murder complaint.
Matandaan nga si Sorioso ang nagsurrender kahapon sa katapo sang Criminal Investigation and Detection Group ukon CIDG-Iloilo sa Barangay San Vicente,Leganes, Iloilo.
Sang nagligad nga Mayo 9 naman nagsungka si Sumbong kag nakahunong na subong sa New Lucena Municipal Police Station.
Nagapabilin naman nga at-large si Gardo Ibrahim.
Ang tatlo amo lamang ang nakitaan sang probable cause nga pasakaan sang murder case matapos nga gin-dismiss sang Iloilo Provincial Prosecutor ang murder complaint batok kanday anay San Dionisio, Iloilo Mayor Peter Paul Lopez, asawa nga si Sally Lopez, kag tatlo nila ka kabataan bangud sa kakulang sa ebidensya.
