ILOILO CITY- Natalana na nga ipresentar sa Provincial Government Environment and Natural Resources Office (PGENRO) sa Biyernes,Mayo 27, ang mga eco-bags nga human sa campaign wastes materials sang nagligad nga election.
Sa interview sang Bombo Radyo kay Mitzi Peñaflorida, Senior Environmental Management Specialist sang PGENRO, iya ginpahayag ang nasambit nga eco- bags ang ginhimo sang mga Persons Deprived of Liberty (PDL) Iloilo City District Jail-Female Dormitory sang Bureau of Jail Management and Penology (BJMP) nga amo ang gin-tap sang provincial government agud magbulig sa pagtahi sang mga eco bags.
Suno kay Peñaflorida, ini nga mga samples ang himuon nga basehan sa mangin pinal nga design sang mga eco-bags.
Nahibaluan nga sang Mayo 23, nagpatawag sang pagsinapol ang PGENRO upod sa mga Local Government Units, Womens Organization, mga kooperatiba kag BJMP.
Matandaan nga ginlunsar sang probinsya ang Limpyo Eleksyon sang May 10 pagkatapos sang May 9 nga piniliay kun sa diin katuyuan sini ang pagpangakas sang campaign paraphernalias nga poster kag tarpaulins.
